ബ്രസീൽ റഷ്യൻ ലോകകപ്പിന്റെ ക്വാർട്ടർ ഫൈനലിൽ. പൊരുതിക്കളിച്ച മെക്സിക്കോയെ എതിരില്ലാത്ത രണ്ടു ഗോളുകൾക്ക് വീഴ്ത്തിയാണ് ബ്രസീലിന്റെ ക്വാർട്ടർ പ്രവേശം. ഗോൾരഹിതമായ ആദ്യപകുതിക്കുശേഷം രണ്ടാം പകുതിയിലാണ് ഗോളുകൾ പിറന്ന‍ത്. നെയ്മർ (51), ഫിർമീഞ്ഞോ (88) എന്നിവരാണ് ഗോൾ നേടിയത്.
ഒറ്റയാൻ പ്രതിരോധവുമായി കളം നിറഞ്ഞ മെക്സിക്കൻ ഗോൾകീപ്പർ ഒച്ചോവയുടെ പ്രകടനമാണ് ബ്രസീലിന്റെ ഗോൾനേട്ടം രണ്ടിൽ ഒതുക്കിയത്. ഒരു ഗോൾ നേടുകയും രണ്ടാം ഗോളിനു വഴിയൊരുക്കുകയും ചെയ്ത നെയ്മറിന്റെ പ്രകടനവും കളിയിൽ നിർണായകമായി. അതേസമയം, ഇന്ന് രണ്ടാം മഞ്ഞക്കാർഡ് കണ്ട കാസിമിറോയ്ക്ക് അടുത്ത മൽസരത്തിൽ കളിക്കാനാകാത്തത് ബ്രസീലിന് തിരിച്ചടിയാകും.
