തലശ്ശേരി: ഗതാഗത നിയമം ലംഘിച്ചു പാഞ്ഞു വന്ന സ്കൂട്ടർ യാത്രക്കാരന്റെ രേഖകൾ തപ്പിയ പൊലീസുകാരനു ലഭിച്ചത് അണലി. 3 ദിവസം മുൻപ് റെയിൽവേ സ്‌റ്റേഷൻ പാർക്കിങ് ഏരിയയിൽ സ്കൂട്ടർ നിർത്തിയിട്ട് പയ്യന്നൂരിൽ കല്യാണ സദ്യ ഒരുക്കാൻ പോയ കതിരൂർ അഞ്ചാം മൈൽ സ്വദേശിയുടേതാണ് സ്കൂട്ടർ. സംഗമം ജംക്‌ഷനിലാണു സംഭവം.
ഇയാൾ തലശ്ശേരി സറ്റേഷനിൽ നിന്ന് വീട്ടിലേക്ക് പോകുമ്പോഴാണ് നിയമലംഘനം ശ്രദ്ധയിൽപ്പെട്ട തലശ്ശേരി ട്രാഫിക് പൊലീസ് സ്റ്റേഷനിലെ സിവിൽ പൊലീസ് ഓഫിസർ കൈ കാട്ടിയത്. രേഖകൾ ആവശ്യപ്പെട്ട പൊലീസുകാരനും സ്കൂട്ടർ ഓടിച്ച യുവാവും ഒരുമിച്ചാണ് സീറ്റുപൊക്കി നോക്കിയത്. സെക്കൻഡുകൾക്കകം ഇരുവരും പാമ്പ് എന്നു വിളിച്ചുകൂവി ഓടിമാറി. ഇതു കേട്ടതോടെ നാട്ടുകാർ കൂടി. ഒടുവിൽ അരമണിക്കൂറിലേറെ പണിപ്പെട്ടാണ് വണ്ടിയിൽ നിന്നു പാമ്പിനെ ഒഴിവാക്കിയത്.
