വാട്ട്സ്ആപ്പില് ജിയോമാര്‍ട്ടിനെ ചേര്‍ക്കാന്‍ റിലയന്‍സ് ലക്ഷ്യമിടുന്നു. ഇതുവഴി ഇന്ത്യയിലെ 400 ദശലക്ഷം ഉപയോക്താക്കളെ ആപ്ലിക്കേഷനില്‍ നിന്ന് പുറത്തുപോകാതെ തന്നെ ജിയോമാര്‍ട്ടില്‍ പര്‍ച്ചേസ് ചെയ്യാന്‍ അനുവദിക്കുമെന്നാണ് ഇതിലൂടെ ലഭിക്കുന്ന സൂചന.വരുന്ന ആറുമാസത്തിനുള്ളിൽ ഈ ഒത്തുചേരൽ യാഥാർഥ്യമാകുമെന്നാണ് റിപ്പോർട്ടുകൾ സൂചിപ്പിക്കുന്നത്.
റിലയന്‍സും ഫേസ്ബുക്കും 2020 ഏപ്രിലില്‍ ബിസിനസ്സ് പങ്കാളികളായി കരാറില്‍ ഒപ്പിട്ടിരുന്നു. റിലയന്‍സ് ഇന്‍ഡസ്ട്രീസിന്റെ ഡിജിറ്റല്‍ യൂണിറ്റ് ജിയോ പ്ലാറ്റ്‌ഫോമിലെ 9.9 ശതമാനം ഓഹരി 5.7 ബില്യണ്‍ ഡോളറിന് ഫേസ്ബുക്ക് വാങ്ങി. ജിയോമാര്‍ട്ടും വാട്‌സ്ആപ്പും ഏകദേശം 3 കോടി ചെറുകിട ഇന്ത്യന്‍ ഷോപ്പുകളെ തങ്ങളുടെ സമീപത്തുള്ള ഓരോ ഉപഭോക്താക്കളുമായി ഡിജിറ്റലായി ഇടപാട് നടത്താന്‍ പ്രാപ്തമാക്കുമെന്ന് അംബാനി അന്ന് പറഞ്ഞിരുന്നു.
രണ്ട് പ്ലാറ്റ്‌ഫോമുകളുടെയും സംയോജനം പ്രധാനമായും വാട്ട്‌സ്ആപ്പ് ഉപയോക്താക്കളെ അപ്ലിക്കേഷനില്‍ നിന്ന് പുറത്തു കടക്കാതെ തന്നെ ജിയോമാര്‍ട്ടിലേക്ക് കടക്കാന്‍ അനുവദിക്കും. ഇന്ത്യയുടെ ദേശീയ പേയ്‌മെന്റ് കമ്മീഷനുമായി സഹകരിച്ച് 2020 നവംബറില്‍ വാട്‌സ്ആപ്പ് പേയ്‌മെന്റ് സംവിധാനവും അവതരിപ്പിച്ചു. റിപ്പോര്‍ട്ട് പ്രകാരം, 2025 ഓടെ ഈ ഇടപാട് ഏകദേശം 1.3 ട്രില്യണ്‍ ഡോളറിലെത്തുമെന്ന് കണക്കാക്കപ്പെടുന്നു. ഈ നിലയ്ക്ക് ഇന്ത്യയുടെ റീട്ടെയില്‍ വിപണിയില്‍ വലിയൊരു പങ്ക് പിടിച്ചെടുക്കാനുള്ള അംബാനിയുടെ ശ്രമം കൂടുതല്‍ ലക്ഷ്യത്തോട് അടുക്കും.
ആളുകള്‍ക്ക് അവരുടെ ഫോണുകളില്‍ ജിയോമാര്‍ട്ടിന്റെ വാട്ട്‌സ്ആപ്പ് നമ്പര്‍ 88500 08000 ചേര്‍ത്ത് ജിയോമാര്‍ട്ടില്‍ ഓര്‍ഡറുകള്‍ നല്‍കാന്‍ കഴിയും, അതിനുശേഷം ഉപയോക്താവിന്റെ വാട്ട്‌സ്ആപ്പ് ചാറ്റ് വിന്‍ഡോയിലേക്ക് ജിയോമാര്‍ട്ട് 30 മിനിറ്റ് വാലിഡിറ്റിയുള്ള ഒരു ലിങ്ക് അയയ്ക്കും. ഈ ലിങ്ക് ഉപയോഗിച്ച് കൂടുതല്‍ പര്‍ച്ചേസുകളും ഓഫറുകളും സ്വീകരിക്കാനാവും. പുതിയ സേവന നിബന്ധനകള്‍ വാട്ട്‌സ്ആപ്പ് കഴിഞ്ഞദിവസം പ്രഖ്യാപിച്ചിരുന്നു. 2021 ഫെബ്രുവരി 8 നകം ഉപയോക്താക്കള്‍ പുതിയ നിബന്ധനകള്‍ പാലിക്കുന്നതില്‍ പരാജയപ്പെട്ടാല്‍ അവര്‍ക്ക് അക്കൗണ്ട് നഷ്ടപ്പെടുമെന്ന് പറഞ്ഞതോടെ വാട്ട്‌സ്ആപ്പിന് കനത്ത തിരിച്ചടി നേരിട്ടു, അതിനുശേഷം പുതിയ പോളിസിയുടെ കരാര്‍ തീയതി വൈകിപ്പിച്ചു. ഇത് ജിയോമാര്‍ട്ടിന് ക്ഷീണമുണ്ടാക്കുമോയെന്ന് കണ്ടറിയണം.
