ലോക അത്‌ലറ്റിക് ചാംപ്യന്‍ഷിപ്പില്‍ വേഗറാണിയായി ജമൈക്കയുടെ ഷെല്ലി ആന്‍ഫ്രേസര്‍. ഇന്നലെ നടന്ന 100 മീറ്റര്‍ ഓട്ടത്തില്‍ 10.71 സെക്കന്‍ഡുകൊണ്ട് ലക്ഷ്യം താണ്ടിയാണ് ഷെല്ലി ഈ അഭിമാന നേട്ടം സ്വന്തമാക്കിയത്. സെമി ഫൈനലില്‍ 10.81 സെക്കന്‍ഡും ആദ്യ റൗണ്ടില്‍ 10.80 സെക്കന്‍ഡുമായിരുന്നു 32 കാരിയായ ഷെല്ലി ആന്‍ഫ്രേസര്‍ കുറിച്ച സമയം. എട്ടാം ലോക കിരീടമാണ് ആന്‍ഫ്രേസര്‍ നേടുന്നത്. ഇതോടെ നൂറ് മീറ്ററില്‍ ഏറ്റവും കൂടുതല്‍ സ്വര്‍ണ മെഡല്‍ നേടുന്ന വനിതാ താരമെന്ന ബഹുമതി ആന്‍ഫ്രേസര്‍ സ്വന്തമാക്കി.
ബ്രിട്ടന്‍റെ ദിന ആഷര്‍ സ്മിത്തിനാണ് വെള്ളി. 10.83 സെക്കന്‍റില്‍ ഓടിയെത്തിയ ദിന ഏറ്റവും വേഗതയേറിയ ബ്രിട്ടീഷുകാരിയെന്ന ബഹുമതിയും സ്വന്തമാക്കി. നിലവിലെ രണ്ടാം സ്ഥാനക്കാരിയായിരുന്ന ഐവറികോസ്റ്റിന്‍റെ മരിയ ഹോസെ ടാലൂവിനാണ് വെങ്കലം. 10.90 സെക്കന്‍റിലാണ് മരിയ ഓടിയെത്തിയത്. അതേസമയം ജമൈക്കയുടെ മറ്റൊരു സ്വര്‍ണ പ്രതീക്ഷയായിരുന്ന നിലവിലെ ഒളിമ്പിക് മെഡല്‍ ജേത്രി എലൈന്‍ തോംസണ്‍ നാലാം സ്ഥാനത്തേക്ക് പോയി.
