
സിംഗപ്പൂര് : ലോകത്തിലെ ഏറ്റവും വലിയ ജനാധിപത്യ രാജ്യവും , ജനസംഖ്യയില് രണ്ടാമത് നില്ക്കുന്നതുമായ ഇന്ത്യ ബിസിനസ് തുടങ്ങാന് ബുദ്ധിമുട്ടുള്ള രാജ്യമായി വേള്ഡ് ബാങ്ക് -ഇന്റര്നാഷണല് ഫിനാന്സ് കോര്പ്പറേഷന് (IFC ) നടത്തിയ പഠന റിപ്പോര്ട്ട് സൂചിപ്പിക്കുന്നു .185 രാജ്യങ്ങളെ ഉള്പ്പെടുത്തിയ പഠനത്തില് ഇന്ത്യ 132-മത് എത്തിയപ്പോള് തുടരെ ഏഴാം വര്ഷവും സിംഗപ്പൂര് ബിസിനസ് തുടങ്ങാന് മികച്ച രാജ്യങ്ങളുടെ പട്ടികയില് ഒന്നാമതെത്തി.വളര്ച്ചയില് പിന്നോക്കം നില്ക്കുന്ന ഇന്ത്യയുടെ സമീപരാജ്യങ്ങളായ ശ്രീലങ്ക 81-മതും ,പാക്കിസ്ഥാന് 107-മതും , ബംഗ്ലാദേശ് 129-മതും എത്തിയപ്പോഴാണ് ഇന്ത്യയുടെ സ്ഥാനത്തില് ഉണ്ടായ ശോഷണം വ്യക്തമാകുന്നത്.വളര്ച്ചയിലേക്ക് കുതിക്കുന്ന ചൈന 91-മതും ,സൗത്ത് ആഫ്രിക്ക 39-മതും നില്ക്കുമ്പോള് ബ്രസീല് ,റഷ്യ എന്നീ രാജ്യങ്ങള് ഇന്ത്യയോടൊപ്പം ഏറെ പിന്നിലാണ് .

ഇതോടെ ലോകരാജ്യങ്ങളുടെ ശ്രദ്ധ സിംഗപ്പൂരിലേക്ക് തിരിയുമെന്നാണ് സിംഗപ്പൂര് സര്ക്കാര് പ്രതീക്ഷിക്കുന്നത്.സ്ഥലപരിമിതിയാണ് സിംഗപ്പൂര് നേരിടുന്ന ഏകവെല്ലുവിളിയെന്ന് വിദഗ്ധര് വിലയിരുത്തുന്നു.സിംഗപ്പൂരില് ഉയര്ന്നു വരുന്ന ചിലവുകള് കമ്പനികളെ ഇന്ത്യയിലേക്കും ചൈനയിലേക്കും മാറ്റി സ്ഥാപിക്കാന് പ്രേരിപ്പിക്കും എന്ന പ്രചാരണങ്ങള്ക്കിടയിലാണ് പുതിയ കണക്കുകള് ലഭ്യമാകുന്നത്.